فوتو: unn.ua
جەرگىلىكتى شەريفتىڭ تىركەۋ دەرەكتەرىنە سايكەس, نيك راينەر جەكسەنبى كۇنى ۇستالىپ, 4 ميلليون دوللار كەپىلمەن قاماۋدا وتىر. قۇقىق قورعاۋ ورگاندارى ازىرگە ونىڭ قاماۋعا الىنۋىنا قاتىستى وزگە مالىمەتتەردى جاريالاعان جوق.
وتباسىنىڭ رەسمي مالىمدەمەسىنە قاراعاندا, روب راينەر مەن ميشەل سينگەر راينەر لوس-اندجەلەستەگى ءوز ۇيلەرىنەن 14 جەلتوقسان, جەكسەنبى كۇنى ءولى كۇيىندە تابىلعان. رەجيسسەر 78 جاستا بولعان, ال جۇبايى 68 جاستا ەدى. قۇقىق قورعاۋ ورگاندارىنداعى جوعارى لاۋازىمدى دەرەككوزدەر ABC News-كە بەرگەن مالىمەتىندە, ەرلى-زايىپتىلاردىڭ برەنتۆۋد اۋدانىنداعى ۇيىندە پىشاقتالىپ ولتىرىلگەنىن راستاعان.
العاشىندا پوليتسيا ءولىمنىڭ ءمان-جايىن انىقتاۋ ماقساتىندا تەكسەرىس باستاعان. الايدا كەيىن ءىس قاساقانا ادام ءولتىرۋ بابى بويىنشا تەرگەلىپ جاتىر.
The New York Times جازۋىنشا, نيك راينەر بۇعان دەيىن ەسىرتكىگە تاۋەلدىلىگىمەن كۇرەسكەنىن اشىق ايتىپ كەلگەن. سونداي-اق ءجاسوسپىرىم كەزىنەن باستاپ بەلگىلى ءبىر كەزەڭدەردە تۇراقتى باسپاناسىز ءومىر سۇرگەنى دە ايتىلعان.
روب راينەر — امەريكالىق اكتەر, رەجيسسەر, پروديۋسەر جانە ستسەناريست. ول CBS ارناسىنداعى «ۆسە ۆ سەمە» سيتكومىنداعى مايكل «ميتحەد» ستيۆيك ءرولى ارقىلى كەڭىنەن تانىلىپ, وسى ءرولى ءۇشىن 1974 جانە 1978 جىلدارى «ەممي» سىيلىعىن العان. سونداي-اق «ۋولل-ستريت قاسقىرى» مەن «سيەتلدەگى ۇيقىسىز تۇندەر» فيلمدەرىندە ويناعان.
روب راينەردىڭ ارتىندا بالالارى دجەيك, نيك جانە رومي قالدى. ول سونداي-اق العاشقى جارى پەنني مارشاللدىڭ قىزى, اكتريسا ترەيسي راينەردى اسىراپ العان.
